ភ្នំពេញ៖ ក្រសួងសុខាភិបាល បានចេញសេចក្តីសម្រេចបិទមជ្ឈមណ្ឌលថែរក្សាសម្ពស្ស «S88» ដែលបង្កឱ្យមានគ្រោះថ្នាក់ដល់អ្នកមកទទួលសេវា ខណៈប្រពន្ធនាយពែក មី បានចូលសង្គ្រោះបន្ទាន់ក្រោយទទួលសេវាកម្មព្យួរសារ៉ូមសាច់សនៅទីតាំងនេះ។

សេចក្តីសម្រេចរបស់ក្រសួងសុខាភិបាលនៅថ្ងៃទី៤ ខែសីហា ឆ្នាំ២០២៣ សម្រេចបិទ និងដកហូតសេចក្ដីសម្រេចឱ្យបើកដំណើរការមជ្ឈមណ្ឌលថែរក្សាសម្ផស្ស អេសប៉ែតសិបប្រាំបី ប៊ីយូធី (S88 BEAUTY) ដែលមានទីតាំងផ្ទះលេខ A៣៧ ផ្លូវជាតិលេខ៤ ភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ និងបន្តអនុវត្តគោលការណ៍ច្បាប់ដែលមានជាធរមាន។

សេចក្តីសម្រេចបានបញ្ជាក់ថា មូលហេតុនៃការសម្រេចបិទទីតាំងនេះព្រោះ ម្ចាស់មជ្ឈមណ្ឌលថែរក្សាសម្ផស្សនេះ បានបើកសាខាជាច្រើនកន្លែងដោយ គ្មានច្បាប់អនុញ្ញាតពីក្រសួងសុខាភិបាល ហើយក្នុងចំណោមនោះមានទីតាំងមួយកន្លែងស្ថិតនៅផ្ទះលេខ១១០ ផ្លូវលេខ៥៣ ភូមិ៤ សង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ បានធ្វើការផ្តល់សេវាកម្មដាក់សេរ៉ូមឱ្យសាច់ស បណ្តាលឱ្យមានគ្រោះថ្នាក់ធ្ងន់ធ្ងរ ដល់ជនរងគ្រោះ ដែលកំពុងសង្គ្រោះបន្ទាន់នៅមន្ទីរពេទ្យ។

គួរឱ្យដឹងដែរថា យោងតាមគណនីបណ្តាញសង្គមផ្ទាល់របស់តារាកំប្លែងលោក ចែម ចាន់ដារ៉ា ហៅនាយ ពែកមី នៅព្រឹកថ្ងៃទី៤ ខែសីហា ឆ្នាំ២០២៣ បានឱ្យដឹងថាខ្លួនកំពុងជួបទុក្ខធំ ខណៈប្រពន្ធរបស់លោកឈ្មោះ ជា សុធីម ចូលសង្គ្រោះបន្ទាន់នៅបន្ទប់ ICU អស់រយៈពេល ២ថ្ងៃហើយ បន្ទាប់ពីលោកស្រី បានព្យួរសេរ៉ូមឱ្យសាច់ស នៅមជ្ឈមណ្ឌលកែសម្ភស្សមួយកន្លែងឈ្មោះ «S88 Beauty» សាខាផ្សារធំថ្មី ដែលមានទីតាំងស្ថិតនៅផ្ទះលេខ១១០E0 ផ្លូវលេខ៥៣ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ៕